នៅមណ្ឌលសុខភាពគូលែន ខេត្តព្រះវិហារ  គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃព្រឹទ្ធសភា (គណៈកម្មការទី៨) ដឹកនាំដោយលោកជំទាវ មាន សំអាន ប្រធានគណៈកម្មការ បានអញ្ជើញចុះសួរសុខទុក្ខបងប្អូនជនភៀសសឹកកំពុងសម្រាកព្យាបាលជំងឺ   និងសម្រាលកូន សរុបចំនួន៥៨នាក់ នាព្រឹកថ្ងៃសុក្រ ទី២៩ ខែសីហា ឆ្នាំ២០២៥។
ឆ្លៀតឱកាសនោះ លោកជំទាវបានពាំនាំនូវការផ្ដាំផ្ញើការសាកសួរសុខទុក្ខពីសំណាក់
សម្តេចអគ្គសេនាបតីតេជោប្រធានព្រឹទ្ធសភា ឯកឧត្តមអនុប្រធានទី១ និងឯកឧត្តមអនុប្រធានទី២ព្រឹទ្ធសភា ជូនដល់បងប្អូនជនភៀសសឹក ដែលបាននិងកំពុងសម្រាកព្យាបាលនៅ មណ្ឌលសុខភាព ព្រមទាំងបានជូនពរសូមឱ្យឆាប់បានជាសះស្បើយ មានសុខភាពល្អ និងបានត្រឡប់ទៅផ្ទះវិញ។
ជាមួយគ្នានេះ លោកជំទាវបានជម្រាបជូនបងប្អូនជនភៀសសឹកចំពោះវីរភាពដ៏អង់អាចក្លាហានរបស់វីរយុទ្ធជនយើង ដែលកំពុងឈរជើងនៅតាមសមរភូមិមុខ តស៊ូ អត់ធ្មត់ ក្រាញននៀល ប្រយុទ្ធការពារបូរណភាពដែនដី និងមាតុភូមិកម្ពុជា ប្រឆាំងនឹងការឈ្លានពានយ៉ាងងងើលបំផុតរបស់ពួកសៀម។
ក្នុងឱកាសនោះដែរ គណៈប្រតិភូគណៈកម្មការទី៨ព្រឹទ្ធសភា បានផ្តល់ថវិកា និងអំណោយជាសម្ភារៈមួយចំនួនជូនដល់មណ្ឌលសុខភាព និងជនភៀសសឹកដែលកំពុងសម្រាកព្យាបាលផងដែរ ដែលជាសក្ខីភាពបង្ហាញពីមនោសញ្ចេតនា រួមសុខ រួមទុក្ខជាមួយបងប្អូនជនភៀសសឹក…។

ប្រភព៖ នាយកដ្ឋានព័ត៌មាន